Қирғизистоннинг Чуй вилояти Сўқулуқ туманидаги 20 июнь куни нефть омборида юз берган ёнғинда тўрт одам жароҳатланди. Уларнинг барчасининг баданлари куйган. Жароҳатланганлардан бирининг аҳволи ўта оғир, икки нафариники ўртача, бир нафарини қониқарли экани айтилмоқда.
Фавқулодда вазиятлар вазирлиги темир йўл ёқасида жойлашган нефть омборида ёнғин соат 16 ларда бошланганини ва 18:06да тўлиқ ўчирилганини билдирди. Ёнғинни ўчиришга Сўқулуқ ва Москва туманларидан учта ва Бишкекдан битта ўт ўчириш экипажи жалб қилинган.
Соғлиқни сақлаш вазирлигининг маълум қилишича, жароҳатланганларга биринчи ёрдам кўрсатиш мақсадида воқеа жойига санавиация воситасида комбустиологлар бригадаси жўнатилган.
Ижтимоий тармоқларда тарқалган видеоларда нефть омборидаги цистерналар ва яқин атрофда тўхтаб турган автомашиналар ёнаётганини кўриш мумкин.
Ижтимоий тармоқларда тарқалган хабарларда айтилишича, ёнғин ҳудудидга яқин жойда яшаётган аҳоли эвакуация қилинган. Ёнғин сабаблари ҳозирча номаълум.
